Ertzaintza asteartean Lasarte-Orian izandako istripuaren lekuko bila dabil

Ertzaintzak lekukoak behar ditu asteartean N-1 errepidean, Lasarte-Orian, Gasteizko noranzkoan, gertatu zen istripuaren nondik norakoak argitzeko. Ezbehar horren ondorioz, furgoneta bateko gidari bat larri zauritu zen, horren ibilgailuak eta kamioi batek talka egin ostean. Furgonetako gidaria, 42 urteko gizona eta Andoaingo bizilaguna, harrapatuta gelditu zen eta suhiltzaileek erreskatatu behar izan zuten.

Hasiera batean, larrialdi zerbitzuek istripua izan zen tokian bertan artatu bazuten ere, gerora, Donostia Ospitalera eraman zuten, larri.

Eusko Jaurlaritzako Segurtasun Sailak jakinarazi duenez, ezbeharra astearte arratsaldean gertatu zen, 16:55ean, Lasarte-Orian.

Ezbeharraren inguruko daturen bat eman dezaketen lekukoei Ertzaintzaren Gipuzkoako Trafiko Sailarekin harremanetan jartzeko eskatu diete, 943 53 91 19 telefonora deituta.