Zigor Aldama, Euskal Kazetarien Elkarteko eta Elkargoko 'Euskal Kazetariak' sariduna

Euskal osasungintzako kolektiboa, Zigor Aldama, Rosa María Calaf, José Manuel Alonso, Mikel López Iturriaga, Luis Calabor eta Gorka Belamendia dira aurtengo sarituak Euskal Kazetaritza Sarietan. Euskal Autonomia Erkidegoko (EAE) hainbat komunikabidetako ordezkariek osatutako epaimahai batek aukeratu ditu sarituak. Euskal Kazetarien Elkarteak eta Kazetarien Euskal Elkargoak antolatzen dituzte Euskal Kazetaritza Sariak, BBKren, Euskaltelen, Ihoberen, Bilboko Udalaren eta LOGI Taldearen babesarekin eta laguntzarekin. Horrela, kazetari elkarteek ostiral honetan jakinarazi dutenez, 'Pertsonaia edo Giza Instituzioa' ataleko saria euskal osasungintzako kolektiboarentzat izan da, COVID-19aren aurrean "lehen lerroan" egindako lan bikainagatik eta "pandemiaren aurkako borrokaren ikur" izateagatik. Halaber, Zigor Aldama berriemailea 'Euskal Kazetariak' atalean saritu dute, eta Rosa Maria Calaf kazetaria 'Adierazpen Askatasunaren José María Portell Saria' kategorian. 'Ibilbide Profesionala Saria' Jose Manuel Alonso kazetariak eskuratu du, eta ' Mikel Iturriagaren 'El Comidista' blogarentzat izan da 'Kazetaritza Digitala - Narratiba Berriak Saria'. Azkenik, 'Juantxu Rodriguez Fotokazetaritza Saria' Luis Calabor fotokazetariari egokitu zaio, eta Gorka Belamendiak irabazi du 'Ingurumen Kazetaritza' kategoriako aitortza. Idoia Jauregi (Radio Euskadi) eta Miguel Ángel Garrosa (Cadena SER) kazetariek aurkeztuko duten sari emate ekitaldia azaroaren 3an izango da, 19:00etan, Bilboko BBK Salan.