Osasuneko 4 profesionaletik 3k gezurtatu behar izan dituzte COVID-19aren buloak

Osasun langileen % 92,4k uste dute pandemiak koronabirusari buruzko bulo gehiago eragin dituela, eta lautik hiruk adierazi dute pazienteek albiste faltsuei buruz dituzten zalantzak argitu behar izan dituztela. WhatsApp da bulo hauen hedapenerako kanal nagusia, #SaludSinBulos Institutuak eta Doctoraliak egindako COVID-19 Osasuneko Buloen III. Azterketaren arabera.

Inkestari erantzun dioten 327 profesionalen % 44ren ustez, berehalako mezularitzako aplikazioa da COVID-19ari buruzko albiste faltsuak zabaltzeko bide nagusia. Ondoren, sare sozialak (% 35), telebista (% 8) eta Internet (% 7) kokatu dituzte.

#SaludSinBulos ekimearen koordinatzaile Carlos Mateosek azaldu duenez, COVID-19ak eragindako egoerak "aurrekaririk gabeko infodemia" ekarri du, "buloak gehiago eta azkarrago partekatu dira komunikazio digitaleko kanal guztien bidez". Mateosen arabera, konfinamenduaren lehen asteetan, #SaludSinBulos ekimenaren jarraitzaileen kontsultak ugaritu egin ziren, eta bigarren olatu honetan buloen gorakada atzeman dute.

Horrelako albiste faltsuak gizartean eragina izaten ari dira. Doktoraliaren sortzaile Frederic Llodachs doktorearen hitzetan, txertaketa-tasak behera egin du herrialde batzuetan, eta buloek osasun-sisteman izan dezaketen eraginaren beldur da.

Txostenaren emaitzak

Txostenaren arabera, formatu digitalak erabiltzen dira gehien buloak zabaltzeko. Fake news edo albiste faltsuak Interneteko artikuluen (% 33), bideo formatuen (% 17) eta argazki edo fotomuntaketen (% 13) bidez zabaltzen dira.

Espezialisten ustez, birusaren jatorria (% 55), txertoak (% 36) eta gaixotasunaren tratamendua (% 35) izan dira gezur gehien eragin dituzten gaiak.

Neurri txikiagoan, COVID-19aren prebentzioa, heriotza tasa, kutsatu eta sendatuen kopurua, eta gaixotasunaren sintomak hizpide zituzten albiste faltsuak aurkitu dituzte adituek.