Euri txikia eta giro egonkorra astearen hasierarako EAEn

Eguraldi egonkorrari eutsiko diogu gurean igande honetan, Euskalmet Euskal Meteorologia Agentziaren iragarpenaren arabera. Eguna hotzetik eta behe-lainoekin hasiko dugu, baina goizean hego-ukituko haizeak uxatu egingo ditu, eta gerora urdingune ederrak nagusituko dira eta giroa epelduz joango da. Nafarroa hegoaldean, Ebro Ibarrean, behe-lainoa iraunkorra izan daiteke. Oro har, arratsaldera arte, giro argia gailenduko da, baina orduek aurrera egin ahala, poliki-poliki zeru-gaina goibelduz joango da. Gauean, hodei hauek, euri apur bat utz dezakete kantauri isurialdean. Termometroak 10-16 ºC artean geldituko dira.

Astelehen honetako hasieran euri txikia egin lezake baina argituz joango da orduek aurrera egin ahala. Goizean, bereziki lehen orduetan, zerua ia estalita agertuko da eta zaparradaren bat edo beste bota dezake, bereziki kantauri isurialdean. Arratsaldean, atertu eta euri-lainoak desagertuz joango dira; ostarte politak irekiko dira, barnealdean bereziki. Tenperaturari dagokionez, baxuenak zertxobait igoko dira eta egunez koska bat behera egingo dute termometroek. Hego-mendebaldeko haizea zakartuz joango da gauean.

Asteartean, berriz, hegoaldeko haizea zakar ibiliko da, ufada gogorrekin eta oso gogorrekin. Goizean zehar, hodeiak eta urdingune ederrak tartekatuko dira. Arratsaldeak aurrera egin ahala, giroa goibelduz joango da eta baliteke zaparradaren bat edo beste botatzea. Tenperaturak egunez koska bat gora egingo dute.