Gizartea -
Palma Arena auzia
Erregearen Etxeak jarduera aldatzeko esan zion Urdangarini 2006an
Palmako Dukearen jarduerek irabaziak ateratzeko asmoa zutela baieztatu ondoren, beste batzuentzat lanean hasteko gomendatu zioten, eta, ahal izanez gero, Espainiatik kanpo.
Erredakzioa
Erregearen Etxeak Noos Institutua uzteko gomendioa egin zion Iñaki Urdangarini 2006an, erakundearen helburua irabaziak lortzea zela ikusi zutenean. Handik urtebetera, jarduera profesionala beste batzuentzat lan egiten bideratu zezala esan zioten; ahal izanez gero, Espainiatik kanpo.
Zenbait hedabidek argitaratutako informazioen harian, Erregearen Etxeak esan du euren aholkulari juridikoa Bartzelonara joan zela 2006an Noos Institutuaren egoera gertutik ikuskatzeko. Erakundearen jarduerak eta hasierako asmoak bat ez zetozela baieztatu ondoren, Urdangarini bertan zuen lanpostua uzteko gomendatu zioten.
Horrez gain, bere jarduera profesionala beste batzuentzat lan egiten bideratu zezala eskatu zioten, ahal izanez gero Espainiatik kanpo. Urdangarinek aholkuari jarraitu eta 2009ko udaberrian Telefonikak AEBetan lan egiteko egindako eskaintza onartu zuen.
Telefonikan
Ordutik Palmako Dukeak Washingtonen bizi dira. Urdangarin Hegoamerikarako Telefonikaren Batzorde Publikoaren presidentea da, eta Cristina emazteak La Caixako fundazioan lanean jarraitzen du, Nazioarteko Saileko zuzendari lanetan.
