Asteburuan 100.000 txerto baino gehiago jarri ditu Osakidetzak

Osakidetzak koronabirusaren aurkako 103.839 txerto jarri ditu ostiraletik asteleheneko lehen ordura arte, Osasun Sailaren azken balantzearen arabera.

Hori horrela, orotara 882.560 txerto jarri dituzte Euskadin orain arte, eta 259.573 pertsona immunizatuta daude dagoeneko (herritarren % 11,7), hau da, dagozkien txertoko dosi guztiak jarrita dituzte. Ostiralean, portzentaje hori % 9,8koa zen.

Hain zuzen ere, orain arte Pfizerren 579.828 txerto jarri dituzte, AstraZenecaren 237.111, Modernaren 53.052 eta Janssenen 12.569.

Adin tarteei dagokienez, immunizazioa ia erabatekoa da (% 98koa) 90 urtetik gorakoen artean. 80 eta 89 urte artekoen artean, % 88,1ek jaso dituzte jada dosi guztiak.

70-79 adin tartean, herritarren % 73,1ek dosi bat jaso dute, eta % 17,6 immunizatuta daude.

Azkenik, 60 eta 69 urte artekoen artean, % 55,9k lehen txertoa hartu dute, eta % 5,9 immunizatuta daude.