Uxotegiko okupek manifestazioa egingo dute itxieraren kontra

Donostiako Alde Zaharreko Uxotegi eraikina hiru hilabetez okupatu duten gazteek manifestazioa deitu dute ostiralerako, atzo eraikina itxi zutela salatzeko.

Agiri batean, okupek Boulevardetik 18:00etan hasiko den manifestazioan parte hartzeko deia egin dute. Era berean, ostegunean 20:00etan, Konstituzio Plazan, lapikoekin zarata egitera animatu dituzte herritarrak.

Gazteek agirian azaldu dutenez, urte askotan ez dute lekurik izan aisialdirako, eta "irtenbide bakarra tabernetara sartu eta kontsumitzea" izan dela diote, izan ere, Alde Zaharrean ez omen dute leku estalirik haien jardueretarako.

Era berean, Uxotegin egon diren bitartean "ilusioz" jarduera asko egin dituztela azaldu dute, eta horri esker auzoari "bizia" eman diotela.