Iñaki Urdangarinek Washington utzi du eta baliteke Gasteizera joatea

Kazetariek Iñaki Urdangarin harrapatu dute Washingtoneko aireportuan Londreseko bidean; ondoren Espainiara joango da. Palma Arena auzian auzipetu zutenetik agertzen diren lehen irudiak dira horiek.

Iñaki Urdangarin bere familia barik zioan eta argalagoa zirudien, elpais.com egunkariak jakinarazi duenez. Antza denez, Palmako dukea Gasteizera joango da Juan Urdangarin, bere aita, bisitatzera; izan ere, azken asteotan bere osasun egoerak okerrera egin du.

Jose Castro Palmako Instrukzioko 3. Epaitegiko epaileak joan den abenduaren 29an auzipetu zuen Iñaki Urdangarin. Epaitegi horrek ikerketarekin jarraituko du; izan ere, Ismael Moreno Auzitegi Nazionaleko epaileak Babel operazioa ikertzeari uko egin dio gaur. Babel operazioak Iñaki Urdangarin Palmako dukeak Noos Institutuan izandako jarduera ekonomikoa ikertzen du.

Epailearen autoaren arabera, auzian ikertzen ari diren iruzurrak ez dira "horren garrantzitsuak" Auzitegi Nazionalak ikertzeko.