Euskara ingurune digitalean sustatzeko ildoak aurkeztu ditu Eusko Jaurlaritzak

Eusko Jaurlaritzak "Euskararen Ingurune Digitala: gomendioak 2021-2024” dokumentua aurkeztu du gaur, Euskararen Aholku Batzordeko Ingurune Digitalean Euskara Sustatzeko Batzorde-atal Bereziak egindako txostena. Bingen Zupiria Eusko Jaurlaritzako Kultura eta Hizkuntza Politikako sailburuak eta Maite Goñi Batzorde-atalaren buruak azaldu dituzte horren inguruko zertzeladak eguerdian, Donostian.

Idatziak lau lan lerro estrategiko definitzen ditu "euskara ingurune digitalean bizirik egoteko": euskarazko eduki digitalak sustatzea, aisialdirako, arlo akademikoan eta hedabideetan; gailu eta plataformetan euskarazko tresna eta aplikazioak sustatzea; euskarari eta euskarazko baliabideei ikusgarritasuna ematea; eta zaintza teknologikoa ziurtatzea.

Ardatz horien gainean, hogeita lau ekintza proposatu dituzte adituek testuan, hala nola euskarazko Wikipedia eta Txikipedia sustatzea, Interneteko enpresa teknologiko handiekin etengabeko harremana bermatzea, norbanakoen eskuko telefonoak euskaraz konfiguratu daitezen sustatzea eta euskarazko baliabideak ezagutzera emateko kanpainak egitea.

Maite Goñi buru duen lantaldeak hainbat aditu, erakunde eta entitateren lankidetza izan du txostena garatzeko, eta proposamenak malgutasunez hartu eta ulertzeko eskatu dute horiek, "ingurune digitala bizia eta aldakorra baita eta, beraz, edozein momentutan egon baitaiteke ekintzaren bat nolabait aldatzeko beharra".