Merkantzia ontzi batek 95 pertsona erreskatatu ditu Mediterraneo itsasoan

Merkantzia ontzi batek 95 pertsona erreskatatu ditu azken orduetan Mediterraneo itsasoan. Gomazko ontzi batean zihoazen, eta, hainbat orduz noraezean ibili ostean, onik erreskatatu dituzte.

Aita Mari salbamenduko euskal ontzia 95 pertsona horien bila ari zen Mediterraneo itsasoan, baina azkenean merkantzia ontzi batek aurkitu ditu, gauerdia baino lehen.

Antza denez, gomazko ontzia Libiako hondartza batetik itsasoratu zen larunbat gauean.

Ontzia zehatz non zegoen ez zekiten, eta GPS seinalearekin arazoak izan dituzte. Hori dela eta, Italiako eta Libiako agintariek ez dute bilaketarik abiatu.

Euskal ontzia Libiako kostaldetik 100 bat miliara zegoen igande goizean, eta, horrenbestez, zonaldean bilatzen ari zen ontzi "bakarra" Aita Mari zen.

Larunbataz geroztik, eguraldiak okerrera egin duela ohartarazi dute Aita Maritik.