Gizon bat atxilotu dute Donostian, beste bi lagun armaz mehatxatu eta gotortu ostean

Gizon batek beste bi mehatxatu ditu arma batekin Donostiako Antigua auzoan eta ondoren bere etxean gotortu da; lau ordu behar izan dituzte gizonak bere burua entregatzeko.

Eusko Jaurlaritzako Segurtasun Sailak jakinarazi duenez, asteazkeneko 21:00ak baino minutu batzuk lehenago, Ertzaintzari jakinarazi diote suzko arma bat zeraman bizilagun batek bi gizon mehatxatu dituela, eta, horren ostean, bere etxean gotortu dela.

Antza denez, telefonia-enpresa bateko langile bat bezero baten Internet zerbitzuarekin izandako arazo bat konpontzera joana zen etxepe horretara, eta solairuetako bateko eskailera-buruan zegoenean, gizon hori bere etxetik atera da eta suzko arma batekin mehatxu egin dio berari eta konponketa eskatu duen bizilagunari, eta Internet gabe utzi duela eta konpontzeko eskatu dio. Egoera horren aurrean, teknikaria eta bizilaguna biktimaren etxean babestu dira, eta gertatutakoaren berri eman diote SOS Deiak 112 zerbitzuari.

Agenteak susmagarriaren etxera joan dira, baina honek ez die etxean sartzen utzi; hori dela eta, Ertzaintzak ingurua hesitu du, gizona armatuta egon zitekeelakoan.

Lau orduko negoziazioaren ostean, 68 urteko gizonak bere burua entregatu du goizaldeko 01: 00ak aldera, erresistentziarik gabe. Ertzaintzak etxebizitza barruan aurkitu du arma, eta, Segurtasun Sailak jakinarazi duenez, atxilotua epailearen esku geratuko da datozen orduetan.