Sei gizonezko atxilotu dituzte Euskadin, etxeko indarkeria leporatuta

Ertzaintzak seipertsona atxilotu ditu azken orduetan Euskadin, genero-indarkeria eta etxeko indarkeria leporatuta. Atxiloketak Barakaldon, Sestaon, Iurretan eta Donostian izan dira.

Herrizaingo Sailak emandako informazioaren arabera, Barakaldon 24 urteko gizonezkoa atxilotu dute bikotekideari ahizto batekin hiltzearekin mehatxu egiteagatik. Emakumeak ihesean atera behar izan zuen etxetik hilabete gutxiko semea besoetan zeramala, lagun baten etxean babesa bilatzeko. Aurretik ere salaketak jarri ditu biktimak tratu txarrengatik.

Ustezko erasotzailea parrandan ibili zen eta etxera iristean mehatxuka hasi zitzaion bikotekideari. Atxilotuak aurrekariak ditu beste zenbait delituengatik.

Era berean, igande honetan, 34 urteko gizonezkoa atxilotu dute Sestaon, emaztearekin eztabaidan egin eta kuxin bat erabilita itotzen saiatzeagatik. Biktima onik atera da.

Iurretan bat eta hiru Donostian

Iurretan, berriz, 55 urteko gizonezkoa atxilotu zuten larunbatean emazteari autoaren barruan eraso egiteagatik. Biktimak zauriak izan zituen aurpegian eta Galdakaoko Ospitalean artatu zuten.

Donostian, aldiz, 33 urteko gizonezkoa atxilotu dute emazteari tratu txar fisiko eta psikologikoak eman eta mehatxu egiteagatik. Gipuzkoako hiriburuan ere beste gizonezko bat atxilotu dute, 40 urtekoa, bikotekide ohiari eraso eta irain egiteagatik.

Azkenik, ostiral gauean, Donostian, Ertzaintzako agenteek 57 urteko gizonezkoa atxilotu zuten 22:00ak aldera, amari irain egin eta tratu txar psikologikoak emateagatik. Tratu txarrak duela hiru urte hasi ziren.