Itxi

Gizartea

Eskola jazarpena

Adinarekiko maila akademiko baxuko mutil atzerritarra; jazarritako ikaslearen profila

EITB Media

Ikusmira Haur eta Nerabeen Euskal Behatokiaren arabera, Euskadin Lehen Hezkuntzako ikasleen % 22,7k bere kideengandik tratu txarrak jasan dituzte.

  • Eskola jazarpenaren biktima den neska bat. EITB Mediaren bideo batetik hartutako irudia.

    Eskola jazarpenaren biktima den neska bat. EITB Mediaren bideo batetik hartutako irudia.

Euskal Autonomia Erkidegoan eskola jazarpena jasan duen ikaslearen profilak honako xehetasunak ditu: mutila, atzerritarra, adinagatik dagokiona baino maila akademiko txikiagoa duena eta haren gurasoek oinarrizko ikasketak dituztenak edo ikasketak amaitzeko dituztenak.

Ikusmirak Haur eta Nerabeen Euskal Behatokiko ordezkariek profil hori marraztu dute, Eusko Legebiltzarreko Hezkuntza Batzordean eskola-jazarpenaz hitz egiteko egin duten agerraldian.

Gaineratu dutenez, ez dute berdinen arteko jazarpenari buruzko azterketa espezifikorik egin, baina tratu txar horiek behatokiak egindako eta jada publiko diren bi txostenetan jaso dituzte: "Euskadiko haurren eta nerabeen errealitatea zenbakitan, 2018" eta "EAEko haur eta nerabeen aurkako indarkeria. Diagnostikoak, erronkak eta orientazioak".

Lehen txostenaren arabera, Lehen Hezkuntzako ikasleen % 22,7k tratu txarrak jasan dituzte hezkuntza arloan bere kideen aldetik.

Sexuaren arabera, nesken % 20k adierazi zuen tratu txarren bat jasan izana, eta mutilen % 25,3k. Halaber, txostenean nabarmentzen da intzidentzia nabarmen handiagoa dela atzerriko jatorria duten ikasleen artean (% 32,3k pairatu du). Hiru urte lehenago egindako kontsultan, indize orokorra % 21,7koa izan zen.

Ikusmira behatokiko ordezkariek adierazi dute ezin dela baieztatu ehunekoaren igoera kasu gehiago gertatzen ari direlako denik, eta azaldu dute azken urteetan tratu txar horiek antzemateko egindako sentsibilizazio-lanaren ondorio izan daitekeela.

Ikusmirak egindako bigarren txostenari dagokionez, bertan Espainiako eta Euskadiko datuak jasotzen direla adierazi dute. Hala, Estatu osoan, haurren eta nerabeen %33k "bullying"aren biktimak zirela esan zuten, %29 mutilak eta %36 neskak.

EAEn, Lehen Hezkuntzako 4. mailako eta Derrigorrezko Bigarren Hezkuntzako 4. mailako bost ikasletik batek adierazi du bere kideren baten partetik tratu txarrak jasan dituela eskolan, mutilen kasuan ehunekoa hori handiagoa da.

Azkenik, behatokiko kideek adierazi dute 2022-2016 aldirako estrategia bat lantzen ari direla, adingabeen aurkako indarkeriari aurre egiteko. Bertan, ikasleen bizitzako eremu guztietan gertatzen diren tratu txar mota guztiak sartu nahi dituzte, bai hezkuntzan zein familian edota aisialdian, erakunde guztiek egoerari aurre egiteko orientazioa izan dezaten.

  • Bisitatuena

      Kargatzen ikusiena
      Kargatzen ikusiena