Gizartea -
Udako kanpaina
Euskadira etorritako bisitarien kopurua % 50 igo da abuztuko lehen 10 egunetan
Javier Hurtado Turismo, Merkataritza eta Kontsumo sailburuak adierazi duenez, nazioarteko turismoa berreskuratzea kostako da, baina "datuak positiboak" izaten ari direla onartu du.
Agentziak | EITB MEDIA
Euskadira heldutako bisitariak % 50 hazi dira abuztuko lehen 10 egunetan, Javier Hurtado Turismo, Merkataritza eta Kontsumo sailburuak igande honetan emandako datuen arabera.
"Aurreikuspenak betetzen ari dira; izan ere, 2020an baino datu hobeak izango ditugu, baina 2019koetara iritsi gabe", adierazi du sailburuak SER katean.
Landa-turismoak susperraldi handiagoa izan du, okupazioa % 89tik gorakoa izan baita; hiri handietan, berriz, susperraldi motelagoa izan da, okupazioa % 69koa izan baita.
Bisitarien profilari dagokionez, turista nazionala dela esan du Hurtadok, Madrildik, Kataluniatik eta Andaluziatik etorritakoa. "Nazioarteko turismoa errekuperatzea kostako zaigu, munduko murrizketak direla eta, baina uztaileko datuetan hobekuntza nabaritu dugu eta abuztuan jarraituko duela aurreikusten dugu", azaldu du.
Osasun murrizketak noiz arindu daitezkeen galdetuta, sailburuak esan du hori "datuak hobetzen direnean" izango dela. "Bihurgunea hobetzen ari da, baina are gehiago egin behar du", gaineratu du.
