Gizartea -
Ikerketa
Irungo haur baten heriotza zuhurtziagabekeriazko hilketa izan ote zen ikertzen ari dira
Bost hilabeteko haurtxoa joan den abuztuaren 10ean hil zen. Ama eta gizonezko bat ikertzen ari dira, deklarazioan bertsio "kontrajarriak, sinesgaitzak eta inkoherenteak" eskaini zituztelako.
O.P. | Eitb Media
Irungo 4 zenbakiko Instrukzio Epaitegia bost hilabeteko haurtxo baten ama eta gizonezko bat ikertzen ari da, abuztuaren 10ean hiriko erdiguneko bulego batean gertatutako neskatoaren heriotza zuhurtziagabekeriazko hilketa izan ote den argitzeko.
Amak nahiz gizonezkoak abuztuaren 17an deklaratu zuten epaitegian, ikertu gisa.
Ama behin-behinean aske utzi zuten behin-behineko neurriekin; autoaren arabera, Ertzaintzak abuztuaren 10eko 11:22an eman zion heriotzaren berri epaitegiari, eta Ertzaintzaren Ikerketa Kriminaleko eta Lurralde Ikerketako Zerbitzuak bere gain hartu zuen gertakarien ikerketa.
Bi egun geroago, Auzitegiko Medikuntzako Euskal Erakundearen Auzitegiko Patologia Zerbitzua jakinarazi zuen "garezurreko haustura parietal" bat zegoela umearen buruan, "altuera jakin batetik azalera lau baten edo antzeko mekanismoren baten aurkako zuzeneko traumatismoarekin bateragarria" eta beraz, "legezko etiologia mediko hiltzaile edo istripuzko" bati lotutako "heriotza bortitza" izan zitekeela.
Auzitegi medikuaren txostenak, halaber, argitu zuen ez zegoela "tratu txarren" zantzurik, eta, "haurraren bat-bateko heriotzaren aukera" baztertzen ez den arren, azpimarratzen du medikuak "garezurreko kolpe baten ondoriozko homizidio edo istripuzko heriotza" aipatzen duela bere lehen txostenean heriotzaren arrazoi gisa.
Txostenak, era berean, zehazten du heriotza 09:00ak eta 10:00ak artean gertatu zela, haurtxoa aipatutako bulegoan zegoenean amarekin eta gizonezkoarekin. Bi horiek gertaeren "bertsio kontrajarriak" eskaini dituzte hasieratik.
Autoak nabarmentzen duenez, "kontrajarriak" izateaz gain, bien deklarazioak "inkoherenteak eta sinesgaitzak" dira, eta "estresak eragindako deklarazioak" izan daitezkeen arren, "harrigarria" suertatzen da emakumeak eta gizonak "egia guztia ez kontatzea, hain gertaera lazgarria eta mingarria izanik amak bere haurtxoa galtzea", are gehiago "haurtxoa bizirik egon litekeen eta oraindik salbatu litekeen" uneei dagokienez esandakon arabera.
"Ez dira kontraesan txikiak, kontu arin edo hutsalei buruzkoak; gaiaren mamiari goitik behera eragiten dieten kontraesanak dira, esaterako, gizonezkoak haurra bizirik eta egoera onean ikusi zuen edo ez, soinuren bat entzun ote zion edo besoetan izan zuen galdetzean erantzundakoak", dio idazkiak.