Itxi

2021/10/12

13:26

Gizartea

Gripea

Talde immunitatearen jaitsierak gripearen eragina areagotu lezake negu honetan

EFE | EITB MEDIA

Hala, datorren gripearen denboraldia urtarrilaren amaieran iritsiko da gailurrera, eta baliteke lehenago eta kasu gehiagorekin hastea. Horregatik, arrisku taldeei txertoa jartzea gomendatzen diete.

  • Gripearen aurkako txertaketa-kanpaina

    Gripearen aurkako txertaketa-kanpaina. Artxiboko argazkia: EFE.

  • Whatsapp
  • Whatsapp
  • Bidali

Covid-19aren aurkako babes-neurrien ondorioz, gripearen zirkulazioa nabarmen jaitsi zen joan den neguan, eta horrek esan nahi du taldean hartutako immunitatea galdu dela eta gaixotasun horrekiko sentikortasun handiagoa dagoela.

Hala, datorren gripe-denboraldia urtarrilaren amaieran iritsiko da gailurrera, eta baliteke lehenago eta kasu gehiagorekin hastea, nahiz eta zaila den aurreikuspenak egitea, eta, horregatik, arrisku-taldeentzako gomendio nagusia txertoa jartzea da.

Iaz "ia ez zen gripe-kasurik izan". Denboraldi normal batean, astean 100.000 biztanleko 250 eta 300 kasu artean daude, eta aurreko denboraldian "marrak zero absolutua ukitu zuen, alde izugarria izan zen", esan du Valladolideko Gripearen Zentro Nazionaleko arduradun zientifikoa Ivan Sanzek.

Ia bi urtez birusaren zirkulaziorik izan ez denez, gure immunitatea baxua da, eta errazago kutsatu gaitezke. "Biologia hutsa da, gorputzak energia aurrezten du, ezin baitu etengabe mantendu antigorputz maila oso altuak, biologikoki oso garestia delako".

Hala ere, gaineratu du populazioaren ikuspegitik begiratu behar dela, ez ikuspegi indibidualetik, azken finean murrizten dena talde-immunitatea delako.

Duela ia bi urtetik gripearen eraginpean egon ez bagara, ez garelako kutsatu eta ez dugulako txertorik hartu, azkenean, "immunitatea murrizten da taldean, eta horrek infekzio gehiago egotea eragiten du".

Gainera, ikerketa estatubatuar baten arabera, negu beroaren ondoren, hurrengo gripe-epidemiak (% 72an) "lehenago hasten dira, denbora gehiago behar dute amaitzeko, eta ohi baino askoz kasu gehiago sortzen dituzte, immunitatea urte batetik bestera galtzen delako, birusak eboluzionatzen jarraitzen baitu".

Sanzen taldeak hipotesi horretatik abiatuta ikerketa bat argitaratu zuen uztailean. Kasu honetan, griperik egon ez denez, "antzeko zerbait" espero daiteke.

Gripearen denboraldi okerragoa izateko aukera agertokietako bat da, baina faktore askok "baldintzatuko" dutela adierazi du Jaime Jesus Perez Espainiako Txertaketa Elkarteko kideak.

Ildo horretan, azpimarratu du iaz izan zela txertorik gehien jarri zuten urtea, % 10 gehiago, eta aurten arriskuko pertsona guztiek edo gehienek egitea lortu behar dute.

Gainera, covid-19aren aurkako neurriak aurreko neguan bezain "muturrekoak" izango ez badira ere, maskara barnealdean erabiltzen jarraitzen da, distantzia gordetzeko gomendioa mantentzen da eta haurrek ikastetxeetan ia neurri berdinekin jarraituko dute, "horiek baitira gripearen epidemia mugitzen dutenak".

Perezen esanetan, "oso zaila da aurreikuspenak egitea"; izan ere, uneren batean hamabi urtetik beherakoei covid-19aren aurkako txertoa jartzeko baimena ematen bazaie eta egungo neurriak lasaitzen badira, horrek eragina izango luke beste arnas birus batzuetan.

Gripearen txertoa egiteko, aurreko denboraldian mundu osoan identifikatutako laginak hartzen dira oinarritzat, birusa norantz doan ikusteko, "zentzu genetikoan eta ebolutiboan", eta, azkenean, aldaera adierazgarrienak hautatzen dituzte, Sanzek azaldu duenez.

Aurten "askoz gutxiago" identifikatu dira, zirkulazio txikia dutelako, eta baliteke birusaren bilakaerak txertoan jarri diren aldaeren "antzekoenak ez diren aldaerak sortu izana".

Hala ere, txertoaren birusarekin "antza handiagoa edo txikiagoa gorabehera", txertoak antigorputzak areagotzen dituztela egiaztatuta dago, eta horregatik txertoa jarri behar dela azpimarratu du, "beti geratzen baitira antigorputzak".

Bestalde, aurten izango da gripearen aurkako txertaketa eta koronabirusarena (oraindik jarraibidea bete ez dutenentzat eta hilabete honetan hirugarren errefortzu bat jasotzen hasiko diren taldeentzat) aldi berean egingo den lehen aldia.

Sanzen esanetan, ez dago arazorik biak batera emateko: "Ez du egiten immunitate-sistemak okerrago funtzionatzea, ezta okerrago egotea ere", izan daitezkeen albo-ondorioak "ez baitira bikoizten".

Gripearen birusa eta covid-19aren birusa elkarrekin zirkulatuz gero, aldi berean hartzeko arriskuaren beldur izan daiteke, baina hori gertatzea "oso arraroa" da, Perezen esanetan, eta bietarako txertoa izanez gero, koinfekzioa are ezohikoagoa izango litzateke.

Gainera, Sanzen arabera, birus biak "nolabait elkar baztertzen dira", covid-19ak infektatzen duenean "badirudi gripeari pixka bat gehiago kostatzen zaiola sartzea", nahiz eta hori lortzen badu, koinfekzioa, oro har, bereizita pasatzen badira baino okerragoa den.

  • Bisitatuena

      Kargatzen ikusiena
      Kargatzen ikusiena
    ;