Moto bateko gidariari sudurra hautsi dio Donostian, eztabaida batean

60 urteko gizon batek muturrekoa eman eta sudurra hautsi dio moto bateko gidariari Donostian, aparkaleku baten inguruan eztabaidan ari zirela, Herrizaingo Sailak jakinarazi duenez.

Erasoa 14:30 aldera izan zen atzo, Donostiako Gasteiz kalean. Biktimak motorra aparkaleku batean utzi zuen, eta gizon bat motorra bere tokitik mugitzen ari zela ikusi zuen.

Azalpen eske berarengana joan zenean, eztabaidan hasi zen eta muturreko bat eman zion pertsona horrek motorreko gidariari.

Kolpearen ondorioz, sudurra hautsi zion eta biktima Donostia Ospitalera eraman zuten. Ondoren, Ertzaintzak ustezko erasotzailea aurkitu eta atxilotu zuen.