Urri osoan egindako euriaren bikoitza bota zuen atzo Getxon

Azken orduotan erruz egin du euria, Euskal Herriaren iparraldean batez ere. Hala ere, euriak ez du aparteko arazorik sortu.

Euskalmetek argitaratutako prezipitazio maparen arabera, atzo Bizkaia mendebaldean eta erdialdean eta Gipuzkoa ekialdean egin zuen euria batez ere. Galean, Getxon, esaterako metro koadroko 60,2 litro pilatu ziren, urria osoan batutakoaren bikoitza. Sangronizen, Sondikan, 56,9 litro batu ziren eta 52,1 litro, Deustun.  

Euriaren ondorioz, Gobela ibaia maila horira iritsi zen Larrainazubin.

Gipuzkoan, Donostiako Miramon auzoan dagoen estazio meteorologikoan 5,1 litro pilatu ziren 10 minututan.

Bestalde, Bizkaiko suhiltzaileek ura ateratzeko zortzi abisu jaso zituzten Getxon, Leioan, Sopelan eta Berangon.

XXI. mendeko bosgarren urririk lehorrena izan da aurtengoa

Euskalmeten esanetan, iragan urria oso lehorra izan da oro har, eta Araba hegoaldean eta Gipuzkoa ipar-ekialdean lehorra. Berez, hil horretan ohikoa den euriaren erdia egin du Euskal Autonomia Erkidegoan. Balio horien ondorioz, mende honetako bosgarren urririk lehorrena izan da.

Euri-egunak ere ohikoak baino gutxiago izan dira. 7 euri-egun zenbatu dira Donostian eta 5 egun bai Bilbon eta bai Gasteizen ere.