Itxi

2021/11/19

19:24

Gizartea

Koronabirusa

COVID-19aren aurkako pilulak baimenik ez badu ere, erabiltzea gomendatu du EMAk larrialdiari aurre egiteko

agentziak | eitb media

Molnupiravir izeneko antibiralak birusaren biderkatzeko gaitasuna murrizten du, eta gaitza harrapatu duten pertsonei ematen zaie.

  • Molnupiravir. Argazkia: EiTB

    Molnupiravir. Argazkia: EiTB

  • Whatsapp
  • Whatsapp
  • Telegram
  • Bidali

Europako Sendagaien Agentziak (EMA) oniritzia eman dio COVID-19aren aurkako molnupiravir pilula antibiralaren erabilerari egungo egoera larriari aurre egiteko, nahiz eta oraindik ez duen baimen ofiziala eskuratu. Europar Batasuneko estatuen esku utzi du pilula banatzeko erabakia.

Europako agentziak azpimarratu du pilula horren merkaturatzea baimendu baino lehenago ematen duen aholku bat dela, estatuei laguntzeko, "COVID-19aren kutsatzeak eta heriotzak ugaritzen" ari direlako.

Lagevrio izeneko sendagaia egunean bitan hartu beharra dago, bost egunez, oxigeno gehigarririk behar ez duten eta larri jartzeko arriskua duten gaixoen kasuan.

Europar Batasunean erabiltzeko baimen ofizialik ez du pilula horrek, eta etengabe aztertzen ari dira emaitzak. Dena den, COVID-19a "diagnostikatu eta berehala" ematea aholkatu du.

Agentziak gainbegiratu omen ditu eskuragarri dituen datu guztiak: sendagaiaren kalitateari buruzko datuak, egindako azterketa osoen emaitzak, martxan dauden ikerketen emaitzak, eta COVID-19 larria edukitzeko arriskua duten ospitaleratu gabeko eta txertatu gabeko pertsonen azterketa nagusia.

Informazio horren arabera, Lagrevriok ospitaleratzeko eta hiltzeko arriskua murrizten du sintomak hasi eta lehenengo bost egunetan egunean bi aldiz 800 mg-ko dosiak hartuz gero.

Segurtasunari dagokionez, albo kalteak arinak edo ertainak izan dira beti; tratamenduan eta hurrengo bi asteetan atzemandakoak beherakoa, zorabioak eta buruko mina izan dira

Haurdun, haurdun geratzekotan edo eraginkorra ez den antisorgailuren bat erabiltzen ari diren emakumeen kasuan ez da pilula erabiltzea gomendatzen, eta berdin edoskitze garaian ere.

Merck Sharp & Dohme farmazia enpresa estatubatuarrak Ridgeback Biotherapeutics bioteknologia enpresarekin elkarlanean egindako pilulak birusaren biderkatzeko gaitasuna txikitzen du.

EBko estatuek EMAren aholku hau erabil dezakete sendagaiaren erabilerari buruzko erabakia hartzeko, farmazia enpresak behin betiko baimena lortu arte, izan ere, ez dago horretarako egutegi finkorik.

  • Bisitatuena

      Kargatzen ikusiena
      Kargatzen ikusiena
    ;