Gizartea -
Eguraldiaren iragarpena
Eguzkia eta giro ederra nagusi igande honetan EAEn
Astelehenean ere giro eguzkitsuarekin hasiko dugu eta tenperaturak ez du gorabeherarik izango. Izan ere, aste osoan zehar eguzkia jaun eta jabe izango da.
Erredakzioa
Euskalmet Euskal Meteorologia Agentziaren arabera, igandean eguzkia eta beroa izango dira nagusi. Zerua garbi samar egongo da eta hego-ekialdeko haize epelari esker, eguerdi partean termometroak maila atseginari eutsiko dio, zenbait lekutan 25ºak gaindituta. Gauean ez du larregi hoztuko eta izotza egiteko arriskua desagertuko da.
Astelehenean eguraldiak joera bera izango du. Astea giro eguzkitsuarekin hasiko dugu, eguzkia jaun eta jabe izango da eta tenperaturak ez du gorabeherarik pairatuko, egunsentia fresko samarra izan arren, eguerdi partean termometroa 25º-ren bueltan errendituko da. Eki eta hego-ekialdeko haize ahula ibiliko da eta hurrengo egunetan giro lehorrarekin jarraituko dugu.
Asteartean eguraldiak ez dauka aldatzeko trazarik eta giro egonkorrarekin eta antizikloikoarekin jarraituko dugu. Zenbait puntutan tenperatura apur bat jaitsi daitekeen arren, apenas nabarituko den aldaketa izango da eta giroa goxa eta epela izango da. Haizea hego-ekialdetik sartuko da, bizi samar tarteka, bereziki kostaldean eta mendi inguruetan.
