Lagun bat autoarekin harrapatu eta alde egiteagatik atxilotu dute

Ertzaintzak 29 urteko gizonezko bat atxilotu du astelehen honetan Bilbon lagun bat autoarekin harrapatzea eta alde egitea egotzita. Aldez aurretik, Bolueta auzoko diskoteka batean liskar bat egon zen, Eusko Jaurlaritzaren Herrizaingo Sailak jakinarazi duenez.

Astelehen honetako goizeko 6:30 aldera Ertzaintzak dei bat jaso du Boluetan dagoen diskoteka batean liskar bat gertatzen ari zela ohartaraziz. Lekukoen arabera, gizonezko batek emakumezko bati burdinazko barra batekin eraso egin dio eta bertan zegoen gizonezko bat emakumezkoa defendatzen saiatu da.

Handik gutxira, gizonezko hori autoz harrapatu dute aurrealdearekin kolpe bat emanez. Istripuaren ondorioz, biktima zauritua gelditu da eta gidariak eta emakumezkoari burdinazko barrarekin eraso dion gizonezkoak alde egin dute.

Ertzaintzaren hainbat patruila bertaratu dira eta agente batzuk zaurituarengana hurbildu diren bitartean, besteek auto susmagarria geldiarazi dute. Autoaren gidaria, 29 urteko gizonezkoa, atxilotu egin dute pertsona bat autoarekin harrapatzea egotzita.