Gizartea -
Emakumeen kontrako indarkeria
Gizon bat atxilotu dute bikotekideari eraso egitea egotzita, Gasteizen
Biktimak adierazi duenez, zazpi urte daramatza tratu txarrak jasaten. Ustezko erasotzaileak aurrekariak ditu.
Erredakzioa
Herrizaingo Sailak jakinarazi duenez, 22:00etan Salburuako etxebizitza batean bikote baten arteko liskarra izan zen. Gizonak emakumeari eraso egin zion, iletik tira eta lurrera jaurti zuen, eraso bortitz hori, alegia, biek duten alaba adingabearen aurrean jazo zen.
Tentsio une batzuen ostean ustezko erasotzaileak etxetik alde egin zuen eta biktimak Ertzaintzari eta senide bati deitu zien laguntza eskatzeko. Ustezko erasotzaileak etxera itzultzean bikotekidearekin eta haren senidearekin egin zuen topo eraikineko atarian. Mehatxu egin zien biei eta biktimaren familiako kideari eraso zion.
Ertzaintzaren agenteek 38 urteko gizona atxilotu zuten emakumeen kontrako indarkeria delitua egotzita. Antza, aurrekariak ditu, gisa horretako gertakariak izan ditu egungo bikotekidearekin eta baita aurrekoarekin ere. Atxilotua epailearen esku jarri dute jada.
