Gizartea -
Sutea
Nahita piztutako sute batek Donostiako eraikin bat kiskali du, eta ustezko egilea atxilotu dute
Egiako Galtzara kaleko 56.ean, abandonatutako etxe batean, hasi dira sugarrak. Printzipioz, ez zegoen inor barruan, baina suhiltzaileak ezin izan dira oraindik barrura sartu.
Eider Garaikoetxea O. | EITB MEDIA
Sutea piztu dute goizean Donostiako Egia auzoko eraikin okupatu batean, Eusko Jaurlaritzako Segurtasun Sailak jakinarazi duenez. Nahita eragindakoa izan omen da, eta Ertzaintzak ustezko egilea atxilotu du.
Egiako Galtzara kaleko 56.ean hasi dira sugarrak, 07:50 aldera. Donostiako suhiltzaileek sua kontrolatzea lortu dute, baina ez dute guztiz amatatu.
Garrek lau solairuko eraikina kiskali dute; izan ere, eraikin zaharra da su hartutakoa, eta egurrezko egitura du. Hego haize zakarra tarteko, arin zabaldu da sua.
Dirudienez, eraikina hutsik zegoen, baina suhiltzaileek baieztatu beharko dute, behar bezala miatu ondoren.
Donostiako Udaltzaingoak ikerketa abiatu du gertatutakoa argitzeko.
