Gizartea -
Trafikoa
Motozale bat zauritu da ihes egin duen gidari batek eragindako istripu batean, Donostian
Donostiako Udalaren iturrien arabera, bi autoren eta motor baten arteko istripua eragin duen ibilgailua identifikatu dute, baina oraindik ez dute gidaria atxilotu.
Mikel Dominguez | EITB Media
Motozale bat zauritu da beste bi ibilgailurekin izandako istripuan, Donostian. Ezbeharra eragin duen autoaren gidariak ihes egin du, Udalaren iturrien arabera.
Gipuzkoako hiriburuko Jose Elosegi alkatearen hiribidean izan da istripua, 06:45 inguruan, motor baten eta bi autoren artean. Istripuaren eraginez, 42 urteko motozalea ospitalera eraman dute, zaurituta.
Istripuan, farola bat ibilgailuetako baten gainera erori da. Gidaria onik atera da, baina kaleko trafikoa eten behar izan dute.
Ihes egin duen ibilgailua identifikatu du Udaltzaingoak, baina gidariaren bila dabiltza oraindik.