Gizon bat atxilotu dute emakume bati sexu erasoa egitea egotzita

40 urteko gizonezko bat atxilotu du Ertzaintzak Villabonan emakume bati sexu erasoa egitea leporatuta. Ustezko erasotzaileari emakume bat indarrez geldiarazi, lurrera bota eta sexu ukituak egin izana egozten diote.

Erasoa igandean 22:00etan jazo zen Villabonako Arroa auzoan. Biktimari Oria ibai ertzaren inguruan txakurra paseatzen ari zela gizonezko bat gerturatu zitzaion, lurrera bota eta sexu ukituak egiten hasi zitzaion.

Emakumea erasotzailearengandik defendatzen saiatu eta laguntza eske garrasika hasitakoan gizonak ihesari eman zion. Ertzainek jasotako deskribapena jarraituz ustezko erasotzailea aurkitzea lortu zuten eta atxilotu egin zuten.

40 urteko gizonezkoari sexu eraso delitua egin izana leporatzen diote.