Clara Campoamorren "lorpenak oroitzeko beharra" gogorarazi du Emakumeen Mugimendu Demokratikoak

Emakumeen Mugimendu Demokratikoa (EMD) elkarte feministak Clara Campoamor abokatu, politiko eta idazlea omendu du Donostian, emakumeen eskubideen defendatzailea hil zenetik 50 urte bete direnean.

Lore eskaintza baten bitartez egin dute omenaldia, Kontxa Pasealekuan dagoen Campoamorren oroimeneko eskulturaren parean. Bertan, Arantza Gonzalez EMDko bozeramaileak ekintzaile historikoak egindako "lana" aldarrikatu du.

"Clara Campoamorrek, emakumeontzako botoa lortzeaz gain, 1931ko Konstituzio errepublikanoaren lanketan parte hartu zuen. Hari esker, sexuagatik diskriminazio eza, ezkontzatik kanpoko seme-alaben berdintasuna eta dibortzioa jaso zituen testuak", azaldu du Gonzalezek.

Era berean, gogora ekarri du haren prostituzioaren aurkako borroka; "guztiz lekuz kanpo" jotzen baitzuen, "emakumeen esplotazioa" zelako. "Gainera, espainiar Estatua prostituzioaren aurkako eta abolizionista aitortzeko borrokatu zuen", azpimarratu du.

Hori dela eta, "bere borroka eta lorpenak gogoratzeko emakumeon beharra" defendatu du, eta "bizirik jarrai dezaten borrokatzeko beharra, baita berdintasunezko gizarte baten alde ere, emakumeei emakume izateagatik indarkeriarik gabekoa".