Itxi

Gizartea

Konektagarritasuna

5G sareetarako sarbidearekin 'hegazkin moduak' ez du luzaroan iraungo EBko hegaldietan

Agentziak | EITB Media

Europar Batasunak iragarri duenez, EBko hegaldietan doazen bidaiari guztiek gailu elektronikoak piztuta eta datu mugikorrak aktibatuta eduki ahal izango dituzte, 5G sareak erabili ahal izateko.

  • Loiuko (Bizkaia) aireportua. Artxiboko argazkia: EFE

    Loiuko (Bizkaia) aireportua. Artxiboko argazkia: EFE

Airelineek 5G sareen azken teknologia eskaini ahal izango dute hegazkinetan, Europako Batzordeak komunikazioei buruz egindako azken eguneratze baten arabera. 2023ko ekainaren 30ean gauzatuko da "beranduenez", erakundearen arabera.

Gaur egun, airelinea guztiek hegazkina aireratzean eta lurreratzean 'hegazkin modua' aktibatzeko eskatzen diete bidaiariei, zein unetan egin behar duten adierazten duen argi-seinale baten bidez.

Konpainiek ezartzen duten segurtasun-neurri bat da, hegazkinaren beste edozein sistema elektrikorekin edo telekomunikazio-sistemarekin interferentziak saihesteko, halakorik balego, hegazkin-istripua eragin baitezakete.

Hegaldian zehar, posible da WiFi sare bat erabiltzea, aldez aurretik airelinea batzuetan ordainduta (besteak beste, Iberian edo Air Europan), hegazkinak altuera jakin bat gainditu duenean, eta aireratzeko zein lurreratzeko pistatik kanpo dagoenean.

Orain, Europar Batasunak iragarri du EBko hegaldietan doazen bidaiari guztiek gailu elektronikoak piztuta eta datu mugikorrak aktibatuta eduki ahal izango dituztela, 5G sareak erabili ahal izateko.

Horrela, bidaiariek "ahalik eta konektibitate handiena" izango dute, "5G sare mugikor batekin bezala lurrean", webgunearen bidez aurreratu dutenez.

Konektibitate-euskarria eskaini ahal izateko, hegazkin-konpainiek sare-estazio bat instalatu beharko dute hegazkin flotan. Estazio horri esker, deiak, mezuak edo datuak satelite sare baten bidez lurreko sare mugikor batera bidali ahal izango dira.

Azpimarratzekoa da Europako Batzordeak errepide bidezko garraiorako berrikuntzak ere sartu dituela, bertan 5 GHz-ko WiFi erabili ahal izango baita autoetan, autobusetan eta beste garraiobide batzuetan.

 

  • Bisitatuena

      Kargatzen ikusiena
      Kargatzen ikusiena