Gizartea -
Emakumeen kontrako indarkeria
Gizon batek labankada bat eman dio bikotekideari Bilbon
Ustezko erasotzaileak laban bat hartu zuen sukaldetik eta bikotekideari zauri bat egin zion eskuineko eskuan.
Erredakzioa
Ertzaintzak 28 urteko gizonezko bat atxilotu zuen atzo Bilbon, bikotekideari labankada bat emateagatik.
Biktima ospitalera eraman behar izan zuten eskuineko eskuan zuen zauri batengatik.
Erasoa, 07:00etan gertatu zen, Bilboko Errekalde auzoan. Ertzaintzak ustezko eraso baten inguruko abisua jaso zuen. Etxebizitzan, emakumea lurrean botata aurkitu zuten eskuineko eskuan zauri bat zuela. Bikotekidearekin liskar bat izan ostean, ustezko erasotzaileak sukaldetik laban bat hartu eta eraso egin ziola kontatu zien ertzainei, eta ondoren, gizonezkoa ihesi joan zela.
Biktima ospitalera eraman zuten artatzera eta hiru ordu eta erdi beranduago, ustezko erasotzailea aurkitu zuen Ertzaintzak. Emakumeen aurkako indarkeria delitua egotzita atxilotu egin dute.
