Gizartea -
Polizia
"Delinkuentzia aldaketari" aurre egiteko neurri gehiago eskatu dizkio ErNEk Eusko Jaurlaritzari
Ertzaintzaren sindikatuaren ustez, agenteek "itsutasun osoz" jokatzen dute delinkuentziari aurre egiteko orduan, baliabide eta langile faltagatik.
Agentziak | EITB Media
ErNE Ertzaintzaren sindikatuak kritikatu duenez, Segurtasun Sailak "ez ditu beharrezko neurriak hartu" delinkuentzian gertatu den aldaketari aurre egiteko. Sindikatuaren ustez, aldaketa hori agerian geratzen da euskal kaleetan izandako "borroken eta arma zurien erakustaldian".
Ikerketa unitateak "desegiten" ari direla salatu du ErNek, eta horrek "erabateko itsutasuna" eragiten duela delinkuentziari aurre egiteko orduan.
Gainera, polizia etxe gehienek "ia ez dute langilerik herritarren salaketak jasotzeko ere", eta "are gutxiago kalean ikertzeko", adierazi dute agirian.
Horri gehitu behar zaio, ErNEren esanetan, kalean "agente gutxi" daudela, egungo delinkuentziari aurre egiteko moduari buruzko "prestakuntzarik ez" dagoela eta "baliabideak emateko orduan zuhurtasun gehiegi" dagoela. Horren ondorioz, gertaera horiek gertatzen direnean, erreakzioa "espero baino askoz okerragoa da", bai Ertzaintzan, bai udaltzaingoetan.
Ildo horretan, polizien sindikatuak adierazi du azken promozioko ia 700 agenteek —"ia guztiak Gipuzkoako polizia etxeetan daude"— ez dutela balen aurkako txalekorik, eta Gabon zahar gauean hori gabe aterako direla lanera. "Taser" pistola elektrikoa eta makila hedagarria ere funtsezkotzat jotzen dituzte.