Gizon bat atxilotu dute Donostian anaiari labanaz eraso egiteagatik

Ertzaintzak eta Donostiako Udaltzaingoak elkarlanean, 45 urteko gizon bat atxilotu dute, anaiari labanaz eraso egitea leporatuta.

Eusko Jaurlaritzako Segurtasun Sailak jakinarazi duenez, erasoa astelehenetik astearterako goizaldean gertatu da, Altza auzoko etxebizitza batean.

Ertzainak bertaratu direnean, toraxean zauriak zituen gizon bat aurkitu dute. Hori dela eta, Donostia Ospitalera eraman behar izan dute.

Erasoaren ondoren ihes egin duen pertsonaren bila hasi dira, eta, ordu batzuetara, Donostiako Udaltzaingoak ustezko erasotzailearen ibilgailua aurkitu du.

Gidaria biktimaren anaia dela ondorioztatu dute, eta atxilotu eta ertzain-etxera eraman dute. Bitartean, gertakarietan erabilitako arma zuria bilatzen hasi dira, eta handik gertu aurkitu dute.

Atxilotua ertzain-etxera eraman dute, Donostiako Guardiako Epaitegiaren esku utzi aurretik.