Gizartea -
Nafarroa
18 urteko gazte bat ospitaleratu dute Iruñean, lau adingabek emandako jipoiaren ondorioz
Antza, lapurreta egin nahi zioten. Iruñeko Sanduzelai auzoan izan da erasoa, igande goizalde honetan. Lau erasotzaileak atxilotu egin dituzte.
AGENTZIAK | EITB MEDIA
18 urteko gazte bat ospitaleratu dute igande goizalde honetan Nafarroako Ospitale Unibertsitarioan, Iruñeko Sanduzelai auzoko jaietan lau adingabek emandako jipoiaren ondorioz. Antza, lapurreta egin nahi zioten. Gazteak hainbat haustura ditu, eta litekeena da ebakuntza egin behar izatea.
Iruñeko Udaltzaingoak Twitter bidez jakitera eman duenez, erasoa 00:30 aldera gertatu da. Adingabeek sakelako telefonoa eskatu diote gazteari, eta horrek uko egin ostean, jipoia eman diote.
Bertan zeuden hainbat herritarrek abisua eman dute, eta erasotzaileak ihes egiten saiatu dira. Azkenean Udaltzaingoak atxilotu ditu, eta gurasoen zaintzapean utzi, Fiskaltzak noiz deituko dituen zain.