Gizartea -
Pederastia
Espainiako Eliza katolikoaren arabera, 728 dira adingabeei bere esparruan egindako sexu-abusuak
Hori ondorioztatzen da Espainiako Gotzainen Batzarrak egindako eta Madrilen jardunaldi batean aurkeztutako 'Para dar luz' txostenetik. Elizak Espainian pederastiari buruz aurkezten duen lehen dokumentua da.
Agentziak | EITB Media
Adingabeak babesteko eta abusuak prebenitzeko Eliza katolikoaren bulegoek 728 testigantza jaso dituzte azken hiru urteetan (martxan jarri zirenetik), joan den mendeko 40ko hamarkadatik 2022ko amaierara arte Eliza katolikoaren esparruan adingabeen edo pertsona kalteberen aurka egindako sexu-abusuen inguruan.
Hori ondorioztatzen da Espainiako Gotzainen Biltzarrak egin eta gaur Madrilen aurkeztu duen 'Para dar luz' txostenetik. Elizak Espainian pederastiari buruz aurkezten duen lehen agiria da.
Datuen arabera, zenbatutako 728 kasuetatik 283 elizbarrutietako bulegoetan jaso ziren eta 445 kongregazioetako bulegoetan. Guztira, 927 biktimak aurkeztu dituzte lekukotasunak bulego horietan.
Abusuak egin ziren datari dagokionez, hamarkadaka ordenatuta, dokumentuak erakusten du kasuen % 80 1990 baino lehen gertatu zirela. Zehazki, 1950 baino lehenagoko bi kasu zenbatzen dira: 40 1950 eta 1960 artean; 137 1960 eta 1970 artean; 172 1970 eta 1980 artean; 127 1980 eta 1990 artean; 45 1990 eta 2000 artean; 20 2000 eta 2010 artean; 60 2010 eta 2020 artean, eta 34 kasu 2020tik aurrera.
Sexuari dagokionez, erasotzaileen % 99 baino gehiago gizonezkoak dira (bost emakume akusatu) eta, biktimei dagokienez, gizonak dira gehienak (% 82,6).
Akusatuen % 63,6 hilda daude
Akusatuen erdia baino gehiago (378 guztira) apaizak dira (% 52). Gainera, 208 erlijioso, 92 laiko eta 23 kasutan salatzaileak ez zuen jakin erasotzailearen kargua. Akusatuen % 63,6 hilda daude.
Txostenak zehazten duenaren arabera, abusu gehienek izaera homosexual maskulinoa dute, eta kasuen % 81,89ra iristen dira; abusu heterosexualak, berriz, % 17,69ra baino ez.
Abusuen % 46,9 eskola-eremuan gertatu ziren (ikastetxeak, institutuak, gelak, eskolako jolastokia, gimnasioak); % 15,79 parrokia-eremuan (parrokia, eliza, errektoretza, parrokia-zentroak) eta % 14,57 mintegietan, barnetegietan edo eskolanietan.
Era berean, denbora librearen edo aisialdiaren esparruan gertatutako kasuen % 7,28 (txangoak, kanpaldiak, erromesaldiak) beste eremu batzuetan ere gertatzen dira (% 15,4), hala nola familia-etxeetan, etxe erlijiosoetan edo autoetan.