Koldo Tellituk Ikastolen Elkarteko presidente izateari utziko dio, 14 urteren ostean

Koldo Tellituk, azken 14 urteotan Ikastolen Elkarteko presidente izan denak, kargua utziko du aurki, eta federazioak "merezitako agurra" emango dio gaur, ostegunarekin, batzar nagusiaren aurretik antolatutako ekitaldi batean. 

Elkarteak ohar baten bidez azaldu duenez, agur ekitaldia 18:00etan egingo dute, Hernanin. Urteko batzar nagusia du federazioak, eta hitzordua baliatu nahi dute Tellitu agurtzeko. Elkarteak astelehenean iragarriko du nork hartuko duen Tellituren kargua.

EAEko Hezkuntza lege berria onartu aurretik utziko du Tellituk kargua, atzo Eusko Legebiltzarreko Hezkuntza batzordean izan ostean. Ikastolen Elkarteko presidentearen azken ekitaldi publikoa izan zen. Astelehenetik, lege-proiektuari ekarpenak egiteko Hezkuntza arloko 40 erakunde, aditu eta eragileren agerraldiak egiten ari dira bertan, eta atzo sindikatuen eta itunpeko ikastetxeen txanda izan zen.

Ikastolen Elkartearen iritziz, Jokin Bildarratzen Sailak atondutako proiektua ''balekoa'' da, baina zehaztasuna falta zaio.