Sua Alt Emporda kiskaltzen ari da, Gironan, eta hiru pertsona hil ditu

Sutea 13:00ak aldera piztu da Jonqueran, Gironan, eta ondorioz herritarrei etxetik ez ateratzeko agindua eman diete, baita Alt Ampordá eskualdeko Agullana, Capmany, Biure, Vilarnadak, Sant Climent Sescebes eta Masarac herrietakoei ere, suhiltzaileen arabera.

Momentuz, hiru pertsona hil dira sutearen ondorioz. Hildako bi frantziarrak dira, gizonezko bat eta 15 urteko nerabea. Autoan zihoazen N-620 errepidetik, Portbou inguruan, eta sugarrek inguratu dituztenean, autotik atera dira eta bere burua itsasora bota dute. Beste 15 pertsonak ere salto egin dute, eta zauriak izan dituzte.

Beste pertsona bat, adinduna, Llersen hil da bihotzekoak jota. Hirugarren pertsona bat, frantziarra, ospitalera eraman dute eta larri dago, gorputzaren % 80 erreta duelako.

Esquadra Mossoek Estanys de Capmanyko udalekuak hustu behar izan dituzte, eta bertan zeuden 74 adingabeak eta 17 helduak Sant Climent Sescebeseko armadaren egoitzara eraman dituzte.

13.000 hektarea, erreta

Suteak 13.000 hektarea inguru erre ditu eta kontrolik gabe hedatzen ari da. Agintarien arabera, "arazoak sortuko ditu gau osoan".

Felip Puig Barne kontseilariak hedabideei egindako adierazpenen arabera, Llersetik Avinyonetera doan suteak 20.000 edo 30.000 hektarea erretzeko gaitasuna dauka.

Suteak orduko sei kilometroko abiaduran aurrera egiten ari da, eta bost metroko sugarrak daude. Generalitateko 320 suhiltzaile jo ta ke lanean ari dira sua itzaltzeko, baina ez dute aireko laguntzarik, haizeak helikopteroak eta hegazkinak martxan jartzea oztopatzen duelako.

Sua itzaltzeko taldeak

Larrialdietako Armadako Unitateak (UME) 150 pertsona eta baliabide mugigarriak bidali ditu sutea itzaltzen laguntzeko. Laguntza hori gauean iritsiko da Jonquerara eta bihar antzerako beste laguntza talde bat gehituko zaie.

Juan Diaz Cruz Barne Ministerioko Babes Zibileko eta Larrialdietako zuzendariak Espainiako Gobernuak Kataluniakoaren eskaerari erantzunda bidalitako laguntza koordinatzen ari da.

Errepideak, itxita

Suteak sortutako ke handiak Abiadura Handiko Trenari ere eragin dio, Frantziako muga zeharkatzen duen tunelari, hain zuzen, eta Figueres eta Perpiñan arteko trenen zirkulazioa eten egin behar izan dute.

Sutearen ondorioz, hainbat errepide ere itxi dituzte, tartean D900 eta A9 autobideak, Perpiñan eta Figueres artean.