Gizartea -
RUBIALES AUZIA
Gobernuak Rubiales kargutik kentzeko eskatuko du Kirol Auzitegiak haren aurkako prozedura abiatzen duenean
Kultura eta Kirol Ministerioaren esanetan, legeak ahalbidetu bezain laster jardun du Espainiako Gobernuak.
AGENTZIAK | EITB Media
Miquel Iceta Espainiako jarduneko Kultura eta Kirol ministroak gaur aurreratu duenez, Espainiako Gobernuak Luis Rubiales kargutik kentzeko eskatuko du Kirol Auzitegi Administratiboak haren aurkako prozedura abiatzen duenean.
"Salaketa tramitera onartu eta 48 orduren buruan, Kirol Kontseilu Gorenaren (CSD) zuzendaritza deitu eta bertan presidente ohiaren behin-behineko kargugabetzea eskatuko dugu, Auzitegiak behin betiko erabakia hartu bitartean", esan du Ministroen Kontseiluaren osteko prentsaurrekoan.
Ministroaren arabera, prozedura hori atzo abiatu zen, eta gaur goizean bertan Auzitegiak hainbat dokumentu eskatu dizkio Espainiako Gobernuari. Horren aurrean, erabakia lehenbailehen etortzea espero duela erantsi du.
Kultura eta Kirol Ministerioaren esanetan, legeak ahalbidetu bezain laster jardun du Espainiako Gobernuak. "Erantzuteko garaian azkarrak eta eraginkorrak izan behar dugu", gaineratu du, betiere "juridikoki zorrotzak" izanda.
Edozein kasutan, Auzitegiak "hain gertakari larrien" inguruko salaketa aintzat hartzea espero du Icetak.
