Euri erauntsiek kaltetutako lekuak hondamendi gune izendatzea eskatuko dute Madrilek eta Gaztela-Mantxak

Goi-geruzetako depresio isolatuak kaltetutako herriak hondamendi gune izendatzeko eskatuko dute Madrilgo Erkidegoak eta Gaztela-Mantxak, bi erkidegoetako presidenteek gaur eguerdian jakinarazi dutenez.

Aldea del Fresno Madrilgo herria izan da denboraleak gogorren astindu duenetako bat, eta bertan hitz egin du hedabideen aurrean Isabel Diaz Ayuso Madrilgo presidenteak. Horren hitzetan, euriteek "suntsituta" utzi dituzte erkidegoaren hego-ekialdean dauden hainbat herri.

Emiliano Garcia-Page Gaztela-Mantxako presidentea, bere aldetik, "hunkituta" agertu da, eta iragarri du eskura dituzten baliabide guztiak "aste osoan" lanean arituko direla, egoera bere onera etorri arte. Horren arabera, "bihar bertan" onartuko dute hodamendi gune izendatzeko eskaera, eta ez du baztertu Europako Batasunera ere jotzea, laguntza eske.

Bi pertsona hil dira

Azken orduotako euriteek gutxienez hiru hildako utzi dituzte Toledon. Horietako bat igogailu baten barruan hil da, Casarrubios del Monte herrian, garajera jaisten ari zela argia joan denean, eta bigarrena auto barruan harrapatuta geratu da Bargasen. Hirugarren gorpua, berriz, Camarena herriko erreka batean aurkitu dute.

Gainera, bi pertsona desagertu dira: gizonezko bat, autoa Alberche ibaira erori ondoren, Aldea de Fresnon (Madril), eta 80 urteko gizon bat, Villamantan (Madril).

Errepide asko itxita egon dira, eta gaur-gaurkoz arazoak daude hainbat errepidetan, batez ere Madrilen, Toledon, Tarragonan eta Sevillan. Asko itxita daude oraindik.

Egoerak, baina, hobera egin du. Aemet Estatuko Meteorologia Agentziak (AEMET) penintsularen erdian indarrean zeuden alerta gorriak eta laranjak kendu baditu ere, astelehenerako abisu horia mantendu du bost erkidegotan, Euskadin, besteak beste.