Gizartea -
Emakumezkoa haurdun dago
Adingabe bat atxilotu dute Sestaon, bikotekideari eraso diolakoan
Biktima ospitale batean artatu dute. Tratu txarren aurkako telefono zenbakia: 016.
Erredakzioa
Ertzaintzak 16 urteko mutil bat atxilotu zuen atzo Sestaon (Bizkaia), bikotekideari erasotzea egotzita. Neska ere adingabea da, eta haurdun dago.
Eusko Jaurlaritzako Herrizaingo Sailak azaldu duenez, hainbat pertsonak Ertzaintzari deitu zioten, merkataritza-gune baten inguruetan mutil bat neska bati erasotzen ari zela ohartarazteko.
Bertaratutakoan, ertzainek anbulantzia bat eskatu zuten, biktimak min handia baitzuen sabelean. Gainera, aurpegian ere zauriak zituen.
Ondoren, poliziek ustezko erasotzailea, haren bikotekidea, atzeman zuten.
Izapideak bukatu eta gero, Adingabeen Fiskaltzaren esku utzi dute atxilotutakoa.
