15 urtez, 1992an hil zen amaren pentsioa kobratzen

Gizonezko bat 15 urtez bere amaren (1992an hil zen) pentsioa kobratzen aritu da eta atxilotu egin dute. Gizonezkoaren alaba ere atzeman dute, diru horretaz baliatzeagatik. Guztira, 85.000 eurotaz jabetu dira urte horietan.

Aitak 64 urte ditu eta alabak 33, biak espainiarrak dira eta iruzurra egitea leporatuta atxilotu dituzte.

Espainiako Poliziak ikerketa bat jarri zuen abian eta gizonezkoaren ama 1992an hil zela egiaztatu zuten, baina Gizarte-segurantzan ez zuten horren berririk eta, ondorioz, pentsioa ematen jarraitu zuten.

Gauzak horrela, hildako emakumearen kontu korronteak aktibatuta segitzen zuen eta eskumena semearena zen. Gainera, Gizarte-segurantzatik jasotako diruaren zati bat alabari igortzen zion.

1997 eta 2011 urteen artean 85.000 euro jaso zituzten, pentsio gisa. 1992 eta 1997 urteen artean jasotako zenbatekoa, berriz, ezin izan dute argitu.

Bi atxilotuek aurrekari penalak dituzte. Une honetan aske daude, baina epailearen aurretik igaro beharko dira.