14 urteko adingabe bat atxilotu dute Donostian bi gazte sastatzeagatik

Ertzaintzak 14 urteko adingabe bat atxilotu du asteazken honetan Donostian, liskar batean ganibet batekin bi gazte sastatzea egotzita, Eusko Jaurlaritzako Herrizaingo Sailak jakitera eman duenez. Gertaera goizaldean jazo da, 05:30ean, Donostiako Zaragoza Plazako zonaldean, hainbat gazteren artean izandako liskar batean. Egun hauetan Aste Nagusiko jaiak ari dira ospatzen Donostian.

Ertzaintzako patruila batek liskarrean parte hartu duten hainbat lagun identifikatu ditu. Horietako bik, 23 urtekoak, arma zuriz eragindako zauriak dituzte, bata toraxean, eta bestea, saihetsan. Biktimak Donostiako Ospitalera eraman dituzte. Ondoren, 14 urteko adingabe bat atxilotu dute, eta arma zuriz egindako eraso delitu bat leporatu diote.