Ertzain bakarra ari dira ikertzen Gogorregiren kontrako erasoagatik

Ertzaintzak ukatu egin du Bilboko Udaltzaingoak Aste Nagusian Gogorregi txosnari eraso egin eta kalteak eragitea leporatuta hiru ertzain identifikatu zituela, eta Herrizaingo Saila ertzain bakarra ikertzen ari dela zehaztu du.

Ertzaintzako Diziplina Unitatea informazioa biltzen hasi da, zerbitzutik kanpo zegoen agente batek istiluetan parte hartu ote zuen argitzeko. Ertzaintzaren unitate hori Bilboko Udaltzaingoarekin jarri da harremanetan, beharrezko informazioa lortzeko.

Gertakariak egiaztatuz gero, diziplina espedientea ireki diezaiokete ertzainari, eta ardurak eskatuko dizkiote.

Gertakaria

Deia egunkariak zabaldu duenez, pasa den ostiral goizaldean gertatu ziren istiluak EAJren gazteriaren Gogorregi txosnan, eta salaketa baten ondoren, lau pertsona identifikatu zituzten.

Aipatu iturrien arabera, txosnako kideak aurre egiten saiatu ziren eta horietako bat jipoitu egin zuten.

Goizeko zortziak aldera joan ziren garbitzen ari ziren eta argiak itzalita zituen Gogorregi txosnara, eta han, edatekoa eskatu zuten, baina itxita zegoela erantzunez, ez zutela edaririk zerbitzatuko erantzun zieten.

Txosnan lanean ari zirenen esanetan, hori ez zitzaien batere gustatu eta orduan piztu zen gatazka. Hiru gizonezko barra barrura sartu eta han zeuden 300 edalontzitik gora bota zituzten.

Ondoren, txosnako kideak aurre egiten saiatu ziren eta horietako bat jipoitu egin zuten. Bertara gerturatutako garbitzaileak poliziari abisua eman zion eta udaletxetik gertu atzeman zituzten identifikatu zituzten lau pertsonak.

Txosnako kideen arabera, erabat mozkortuta zeuden eta ez zirudien alkohola bakarrik edan zutenik.