Gizon bat atxilotu dute Forondan hegazkinen erregaia lapurtzeagatik

Ertzaintzak Forondako hegazkinak erregaiz hornitzen dituen enpresako langile bat atxilotu du, kerosenoa behin eta berriz lapurtzea egotzita.

Ertzaintzak adierazi duenez, atxiloketa joan den asteazkenean izan zen, eta arabar aireportuko hegazkinentzako erregaia prestatzen duen azpikontratazio enpresa bateko 47 urteko langile bat atxilotu zuten.

Agenteek aste hasieran ekin zioten ikerketari, enpresak jarritako salaketa dela eta. Ustez, azken hilabeteetan, gutxiagotze nabaria gertatzen ari baitzen erregai-tangetan.

Agenteek jarraian erlazionatu ahal izan zuten enpresa horretako langile bat keroseno lapurreta horrekin. Atxilotuak erregai-tangen hodietatik lortzen zuen kerosenoa, eta enpresaren furgoi batean ateratzen zuen bertatik, horretarako prestatutako bidoi batzuetan.

Horren ostean, lonja batean gordetzen zuen, kontsumo partikularrerako erabiliz.

Joan den asteazkenean, aipatutako pabilioira eraman zituen kontrol eta jarraipen operazio bat jarri zuten martxan agenteek. Bertaratzean, erregai-bidoiak husten aurkitu zuten atxilotua.

Mila litroko lapurreta

Ustez, lapurreta horretan lapurtutako kantitatea mila litro keroseno ingurukoa izan da.

Oraingoz, Ertzaintzak ez du ikerketa itxi, lapurreta horretan beste hainbat pertsonek lagundu zioten edota EAEko beste aireportuetan lapurretarik egin zuen ikertzen ari baita.