Pederasta bat atxilotu dute kontsolarekin sexu-jazarpena egiteagatik

28 urteko gizonezko bat atxilotu dute Sevillan Esquadra Mossoen ikerketa baten ostean. X-BOX bideojokoen kontsolaren bitartez, ustez 50 adingabe ingururi sexu-jazarpena egin zien.

Poliziak jakitera eman duenaren arabera, Ismael G.P. espainiarra da eta Castilleja de Guzman herriko bizilaguna da (Sevilla). "On-line" jokatzen zuten haurrekin kontaktuan jarri eta euren konfiantza irabazi ostean, biluzteko eskatzen zien.

Atxilotuaren etxebizitzan milaka argazki eta bideo atzeman dituzte.

Urte hasieran hasi ziren ikerketarekin. Lleidako eta Bartzelonako 11 eta 12 urteko bi gaztek salaketa jarri zuten, Internet bidez eurekin kontaktatu eta sexu-organoak erakusteko eskatu zielakoan.

Atxilotuak X-BOX kontsola erabiltzen zuen haurrekin kontaktuan jartzeko. Beste batzuetan, ordea, sare sozialak eta Internet bitarteko telefono programa bat ere erabiltzen zituen. Vladir Krutshih ezizena erabiltzen zuen eta hainbat helbide elektroniko zituen: masacrehacker@facebook.com, navodnenie@gmail.com,masacrebox@hotmail.com y masacrex@live.com.

Haurrek eskatutakoa egin ezean, mehatxu mezuak bidaltzen zizkien, eta euren ordenagailuak "hackeatuko" zituela eta dagoeneko lortutako argazkiak zabalduko zituela esaten zien.

Mossoek hainbat grabazio lortu dituzte eta horietako batean, adingabe bati sexu-organoak erakusteko eskatzen dio. Honek negarrez ezezkoa ematen dion arren, pederastak mehatxu egiten dio.

Poliziaren arabera, atxilotuak aurrekariak ditu antzeko gertaerengatik. Halaber, harrokeriaz agertzen du "Europako pederastarik handiena eta ospetsuena dela" eta pederasta aktiboa dela onartzen du. Gainera, zazpi eta hamaika urte bitarteko haurrekin sexu harremanak dituela esaten du.