Gizartea -
Altzania mendilerroan
Aratz mendian galdutako mendizale bat onik aurkitu dute
Arantzazuko santutegitik Aratz mendira igo zen 28 urteko mendizaleak orientazioa galdu zuen gau partean.
Erredakzioa
Galduta zegoen 28 urteko mendizale bat onik aurkitu dute bart, Aratz mendian, Araba eta Gipuzkoa artean dagoen Altzania mendilerroan, Ertzaintzak ohar batean azaldu duenez.
21:45ean, mendizalearen senitarteko batek SOS Deiak zerbitzuari abisua eman zion, izan ere, mendizaleak, mugikorraren bitartez, orientazioa galdu zuela ohartarazi zion. Ordu batzuk lehenago Arantzazuko santutegitik igo zen Aratz mendira.
Jaurlaritzako larrialdietako zerbitzuak gaztearekin kontaktuan jarri ziren, zegoen toki zehatza zein zen jakiteko. Aldi berean, Ertzaintzaren Erreskate Taldea bertara joan zen.
Mendizalearen senitartekoek eta lagunek ere bilaketa lanetan parte hartu zuten eta azkenean, gauerdian, onik aurkitu dute.