'Seme-alabak hobiratu nahi ditut, nik izan nituen eta eskubidea dut'

Ruth Ortiz 2011ko urrian desagertu ziren Ruth eta Jose anai-arreben amak haien hezurrak itzultzea eskatu du: "Nire seme-alabak hobiratu besterik ez dut egin nahi, nik izan nituen eta haien aita dohakabeak utzi zituen gorpuzkiak lurperatzeko eskubidea dut", azaldu du.

Huelvan, komunikabideen aurrean egin dituen adierazpenen arabera, Ruth Ortizek "Quemadillaseko" etxealdeko suan aurkitutako hezurrak itzultzea nahi du, bertan erraustu baitzituen, ustez, Jose Breton aitak. Harrezkero, kartzelan dago, bere seme-alabak desagertzea eta hiltzea leporatuta.

Jose Maria Sanchez de Puerta abokatuak eta Fiskaltzak hezurrak itzultzea errefusatu (epaiketan froga bat direla eta bertan mantendu behar direla uste izanda) ostean egin du amak eskaera publikoa.

Ortizen hitzetan, eskatzen duena "justua" da, eta kontuan hartzeko esan du, "Estatuan justizia badagoela" pentsatu nahi duelako. Halere, bere seme-alaben kasuan gertatzen ari dena ikusita, "egoera jakin batzuetan justizia bere kabuz egiten duen jendea egoteak ez nau harritzen", adierazi du, eta honako hau nabarmendu du: "Batzuetan, hori egiteko gogoa dut nik ere".

"Ez dut minutu bat gehiago ere isilean eman nahi"

Senarrak, antza, bere seme-alabak hil eta erre zituela urtebete igaro berri denean, Ruth Ortizek esan du ezin duela eta ez duela minutu bat gehiago isilean eman nahi. Halaber, hilabeteotan kasuaren inguruan ulertu ez dituen erabakiak izan direla azaldu du, baina isilik jarraitu duela, seme-alabak non zeuden jakiteko mesede egiten ari zelakoan.

Breton "manipulatzaile aparta" dela esan du, eta "bi aldiz hiltzailea" izan den pertsonak hitz egiteak seme-alabak kentzeak eragiten duen dolua baino garrantzitsuagoa izatea deitoratu du.

"Tontakeriak entzuteaz nazkatuta nago, besteak beste, epai bat izan arte nire seme-alabak hobiratu ezin direla eta hezurrak babesteko katea zalantzan jarri izana entzuteaz", esan du.

Sanchez Puerta eta Josefina Lamas Polizia Zientifikoak egin zuen lehen txostenaren teknikoari buruzko iruzkinekin egiten ari direna seme-alaben hezurrak itzultzea "atzeratzea" da, Ortizen ustez.

"Ez dakit zertara itxaron" behar dudan seme-alabak hobiratzeko: "Nik dakidala hilketagatik ez da gorpuak epaiketan izan behar duen prozesurik izan". "Nire seme-alabak lehenbailehen bakean lurperatuta egotea nahi dut", azpimarratu du.