Urtebete geroago, Hugo Chavez gogoan

Gaur urtebete beteko da Hugo Chavez Venezuelako presidentea hil zela, baina haren legatuak bizirik dirau oraindik. Karismatikoa, polemikoa eta izaera eta jenio handikoa zen. Halaber, nazioarteko buruzagiei interpelatzeko zuen moduak eskola sortu zuen.

Hugo Chavez Venezuelako presidentea minbiziak jota hil zen 2013ko martxoaren 5ean (58 urte), 20 hilabetez gaixotasun horren aurka borroka egin eta gero.

Hasitako proiektua amaitu gabe hil zen Hugo Chavez. 2012ko urriaren 7ko hauteskundeak irabazi zituen, baina ez zuen presidente kargua zin egiteko aukerarik izan Kubako ospitale batean zegoelako.

Behartsuenek gurtu egiten zuten Venezuelako pobrezia gutxitzea lortu zuelako eta, aldiz, oposizioko kideek eta liberalek gorroto zuten aberatsen kontra borrokatzen zuelako. 13 urte boterean egon ostean, pobreak bereganatzea lortu zuen. Pobrezia % 50etik % 27ra jaistea lortu zuen, eta hori zen hauteskundeak irabazteko baliatzen zuen arrazoietako bat.

Urtebete geroago, Hugo Chavezen irudiak ikus daitezke Caracaseko kaleetan, eta herrialdea bitan banatuta dago: chavistak eta oposizioko kideak

Chavezen aldeko ekitaldiak

Nicolas Maduro Venezuelako presidenteak Hugo Chavezen aldeko omenaldietan parte hartzeko deia egin die venezuelarrei, baina modu baketsuan aritzea aldarrikatu du.

"Urtebete igaro da gure Betiko Komandantea joan zela, eta hura bakean eta maitasunez omentzeko dei egiten diot herriari", adierazi du Madurok Twitterreko kontuan. Azaldu duenez, desfile hiritar-militarra egingo dute eta ibilaldi horretan Mendiko Kuartelera bisita egingo dute, hain zuzen ere, Chavez lurperatu zuten tokira.

Latinoamerikako hainbat liderrek parte hartuko dute gaurko ekitaldietan, besteak beste, bertan izango dira Evo Morales Boliviako presidentea eta Daniel Ortega Nikaraguako presidentea.

Venezuelako Komunikazio Ministerioak azaldu duenez, Chavez oroitzeko ekitaldiak gaur hasi eta martxoaren 15ean amaituko dira.