Mundua -
TRENBIDETIK ATERA DA
19 pertsona hil dira eta 107 zauritu Egipton, tren-istripu batean
Oraindik ez dute argitu istripua zerk eragin duen, baina, dirudienez, bi bagoi errailetik atera dira. Egiptoko Armadako soldaduak zihoazen trenean.
Erredakzioa
19 pertsona hil dira eta 107 zauritu, Gizako probintzian (Egipto), tren-istripu batean. Antza denez, bi bagoi trenbidetik atera dira.
Ezbeharra Abu Ruba tren-geltokian jazo da, Hauandiya herrian, Kairotik 18 kilometro mendebaldera. Istripuaren ondoren, 66 anbulantzia bertaratu dira, zaurituak ezbeharraren tokitik ateratzeko eta mediku laguntza emateko. Hildako eta zauritutakoen zenbatekoak ez dira behin betikoak.
Istripua zerk eragin duen ez dute oraindik argitu. Mohamed al Shahatek, Garraio Ministerioko bozeramaileak, bi bagoi errailetik atera direla adierazi du; gehiegizko abiadura edo tren-gidariaren hutsegite bat jo dituzte hipotesitzat.
