Rafael Correa berriz ere hautatu dute presidente, lehenengo itzulian

Rafael Correa presidenteak berriz ere irabazi ditu Ekuadorreko hauteskundeak, eta hamar urte egingo ditu agintean. Herrialde horretan jarraian inoiz izandako agintaldi luzeena izango da.

2009. urtean bezala, Correak botoen erdiak baino gehiago eskuratu ditu, eta, horrenbestez, saihestu egin du bigarren itzulia egin behar izatea.

Adituen ustez, ekonomiaren egoera oparoa (azken urteetan hazkundea izan du) eta hezkuntzan, osasunean eta herri lanetan inbertsioak areagotu izana giltzarri izan dira ekuadortarren babesa izateko.

Botoen % 50 baino gehiago zenbatuta, hautesleen % 57k Rafael Correaren alde bozkatu dute, eta % 24k Guillermo Lasso bankari ohiaren alde.

Datuak ezagutu eta gero, Correak agerraldia egin du Carondeleteko jauregiaren (Gobernuaren egoitza) balkoitik, boto-emaileen babesa eskertzeko. "Iraultza hau ez du inork geldituko", esan die.

Correa (Hugo Chavez venezuelarraren eta Evo Morales boliviarraren aliatua da) Ekuadorren agintaldi osoa burutu duen lehen presidentea da 1996. urtetik.

Correa 2007. urtean egin zen presidente. Urte horretan, herrialdea 1999. urteko krisialditik suspertzen ari zen, dolarrera aldatu eta gero.

Presidenteak (ezkertiarra da) kanpo zorraren ordainketa eten zuen 2008. urtean, eta erabaki horrek nazioarteko merkatuen ateak itxi bazizkion ere, gastua eta inbertsio publikoa handitzea lortu zuen, petrolio esportazioari, diru-bilketari eta Txinaren laguntzari esker.

Diru publikoa erabilita, Ekuadorreko ekonomia % 8 hazi zen 2011.ean, eta % 5 iaz. Aurten, hazkundea % 3,5ekoa izango dela aurrez ikusi du Gobernuak.