Mundua -
Brusela
Legez-kanpoko inmigrazioa ardatz EBaren Goi-Bileraren bigarren egunean
Nahiz eta Lampedusako hondoratzearen ostean adostutako erantzun bat ematen saiatuko diren, ez dute espero legez-kanpoko inmigrazioaren gaineko erabaki eraginkor bat hartzea.
Erredakzioa
Europar Batasuneko (EB) Estatu eta Gobernu buruek Goi Bileraren bigarren eta azken jardunaldiari ekin diote, Lampedusa Italiako uhartearen inguruan gertatutako hondoratzearen ostean, legez-kanpoko inmigrazioren gainean adostutako erantzun bat emateko asmoz.
Angela Merkeli ustez egindako espioitza estatubatuarra izan zuten hizpide lehenengo jardunaldian, eta gaur, ostirala, Europako inmigrazioaren politikari buruz arituko dira, baina ez dute espero erabaki eraginkor bat hartzea.
Europako Kontseiluak, ordea, prebentzioan eta elkartasunean sakontzeko asmoa du, itsasoan heriotza gehiago ez gertatzeko eta horren moduko tragediak berriro gerta ez daitezen.
Europako hegoaldeko kideek Europa mailako migrazio-lekualdatzea kudeatzea eta EBren jarrera aldatzea ezinbestekotzat jo dute.
Enrico Letta Italiako lehen ministroak; Mariano Rajoy Espainiako Gobernuko presidenteak eta Andonis Samaras Greziako lehen ministroak gai hori, hain zuzen, izan zuten hizpide atzo, osteguna.
"Gure jarrera gogorra izango da Europak migrazio-lekualdatzearen inguruko ikuspegia eta kudeaketa aldatzea nahi dugulako", esan zuen Lettak Goi-Bileraren lehenengo egunean.
Mediterraneoaren inguruko herrialdeen eskaria testu orokor batean jasoko dute, baina, ez dute espero legez-kanpoko inmigrazioaren gaineko erabaki eraginkor bat hartzea.
