New Yorkek alkate ezkertiarra aukeratu du

Bill de Blasio demokrata izango da New Yorkeko hurrengo alkatea, hauteslekuetan Joe Lhota errepublikanoari aise irabazita, 50 puntuko aldea atera baitio.

De Blasio ezkertiarra da, eta desberdintasunaren aurkako borroka izan du oinarri hauteskunde kanpainan. Izan ere, New York "bi hiriren ipuina" dela adierazi du: aberatsena eta pobreziaren mugaren azpitik bizi direnena.

Botoen % 84 zenbatuta, De Blasiok botoen % 73 eskuratu ditu, eta Lhotak, % 24. Berrogeita hamar puntuko alde historikoa.

Hautagai demokrata zuria da, emakume afroamerikar batekin ezkonduta dago, eta seme-alaba mestizoak ditu. Gainera, "stop and frisk" (Poliziari nornahi geldiarazteko eta miatzeko eskubidea ematen dion politika, batik bat beltzak eta latinoak jomugan jartzen dituena) politikaren aurka agertu da, argi eta garbi. Horrek guztiak etnia eta kultura guztietatik babesak jasotzea ahalbidetu dio.

De Blasiok zergak igo nahi dizkie aberatsenei, haurren hezkuntza eta arratsaldeetan ere eskolak eskaintzeko programak finantzatzeko.

Bloombergen urteak

'Sagar Handia'ren azken alkatea, Michael Bloomberg, 12 urte izan da agintean, eta, urte horietan, hiriaren ekonomiak hobera egin du, eta hirigintza ere zeharo aldatu da. Halaber, kriminalitatea inoiz baino txikiagoa da, eta turismoa eta diru-sarrerak inoizko handienak dira.

Nolanahi ere, hobekuntza hori ez dute berdin nabaritu herritarrek, 8,3 milioi newyorktarren % 46 pobreziaren mugaren azpitik bizi baitira, eta eraikuntzaren sektoreko enpresek gehienbat luxuzko etxebizitzak eraikitzen batituzte.