Gutxienez 21 lagun hil dira Abujan izandako leherketan

Gutxienez 21 lagun hil dira eta beste 17 zauritu dira Nigerian, Abuja hiriburutik gertu dagoen merkataritzagune batean izandako leherketan. Emergentzia zerbitzuek jakitera eman dutenez, luxuzko merkataritza gune batean izan da leherketa, Banex Plaza gunean.

"Leherketa handi bat entzun da. Dendako leihoak mugitu dira, eta korrika irten gara. Jendea korrika ari zen; batzuk, gainera, odoletan zeuden", esan du leherketa gertatu denean bertan erosketak egiten ari zen lekuko batek.

Azken hilabeteetan, ia egunero izan dira atentatuak Nigerian, gehienetan Boko Haram taldeak egindakoak. Abujan ere hainbat atentatu izan dira. Maiatzean, bonba auto batek 15 hildako eragin zituen, eta, hilabete lehenago, 75 hildako eragin zituen autobus-geltoki batean izan zen leherketak.